د شهر آرا سترګو او نسایي ولادي تدریسي روغتونونو کارکونکو ته له اداري فساد سره د مبارزې او ښه نظم او ډیسپلین مراعتولو په موخه غونډه تر سره شوه
د کابل طبي علومو پوهنتون د مالي او اداري مرستیال محترم مولوي عبدالرحمن مرحوم په مشرۍ د شهرآرا سترګو او نسایي ولادي تدریسي روغتونونو کارکونکو ته له اداري فساد سره د مبارزې او په چارو کې د اخلاص په موخه یوه ورځنۍ اصلاحي ناسته تر سره شوه.
غونډه د قرانکریم د څو مبارکو آیتونو په تلاوت سره پیل شوه په پیل کې مالي او اداري چارو مرستیال مولوي عبد الرحمن مرحوم د لوړو زده کړو وزارت د مشرتابه هدایتونه او لارښوونې لکه: په روغتونونو کې د اداري چارو تر څنګ په جماعت سره د لمانځه پابندي، د دعوت او ارشاد مسوولینو له لوري په دیني درسونو کې ګډون، د روغتونونو هر اړخیز نظافت او پاکوالی، په مالي چارو کې دقت، پر وخت د اسنادو (مکتوب، پېشنهاد ...) طی مراحل کول، د اوامرو منل، له مراجعینو سره ښه سلوک، د ادارو ښه مدیریت، د حاضرۍ پابندي او یو شمېر نورو مهم موضوعات د دغه روغتون له مسوولینو او کارکونکو سره شریک کړل او له هغوی یې وغوښتل چې په دغه برخو کې پوره توجه وکړي.
د کابل طبي علومو پوهنتون د ارشاد او دعوت آمر مولوي حبیب الله حماد د یاد روغتون کارمندانو ته په خپله وینا کې وویل: چې دنده تر سره کول یو امانت دی او دغه امانت باید په پوره همغږۍ، همکارۍ ښه نیت او اخلاص سره تر سره شي. همدا رنګه نوموړي زیاته کړه چې په روغتونونو کې د اختلاط موضوع ته هم باید جدي پاملرنه وشي.
د سترګو تدریسي روغتون رئیس ډاکټر محمد بشیر عثماني د ښه راغلاست تر څنګ د کابل طبي علومو پوهنتون د مالي اواداري چارو معاونیت له لوري د روغتونونو له کارکونکو سره د دغه ډول جلسو تر سره کول مهم وبلل او ډاډ یې ور کړ چې د یادو موضوعاتو په عملي کولو کې به پوره هڅه کوي.
د یادولو وړ ده چې تر جلسې وروسته د مالي او ادري چارو مرستیال او ورسره پلاوي د روغتون له بېلا بېلو برخو څخه ليدنه وکړه او په ځینو برخو کې د موجوده ستونزو په اړه یې مسوولینو ته لارښوونې او سپارښتنې هم وکړې.
