د غوره روغتیایي خدماتو په وړاندې کولو کې د "درملو معقول کارول" مهم او اړین اصل دی
په همدې موخه نن یکشنبه د روان کال د زمري پر ۲۹ نېټه د "درملو معقول کارولو" تر عنوان لاندې ورکشاپ د کابل طبي علومو پوهنتون فارمکولوژي ډیپارټمنټ لخوا د روغتیا نړیوال سازمان په مالي لګښت د کادري روغتونونو ډاکترانو ته په داسې حال کې چې د روغتیا نړیوال سازمان او د افغانستان د درملو او خوړو ملي ادارې استازو هم حضور درلود، جوړ شو.
د پوهنتون علمي مرستیال پوهاند دوکتور نجیب الله امرخېل د ورکشاپ له جوړېدو د مننې تر څنګ وویل چې د درملو معقول کارول د خلکو او ناروغانو د ژوند ژغورنې او په روغتیایي خدماتو کې د باور رامنځته کېدو لامل کېږي.
دغه ورکشاپ چې پينځه ورځې به دوام ولري له اجنډا سره سم د درملو معقول کارول، د درملو غیرمعقول کارولو بنسټیز عوامل، د درملو معقوله کارولو ترویج، له معیاري لارښوونو سره بلدیت او ګټه اخیستنه، د درملو د توزیع له مناسبه میتودونو ډاډ تر لاسه کولو او په بیلابیلو کچو د درملو معقول او غیر معقول کارولو په اړه به استادان خپل سیمینارونه وړاندې کړي.
دا په داسې حال کې ده چې ډېری ناروغان د انټي بیو ټیک او نورو درملو څخه چې یوازې د ډاکټر په اجازه او یا دنسخې په موجودیت کې باید ورکړل شي، خپلسره درملنه کوي چې دغه دوایی له بده مرغه د غیر مسلکي پلورونکیو لخوا په پرچون ډول خرڅېږي.
