د کابل طبي علومو پوهنتون محصلینو د لومړي ځل لپاره د خوست له جهادي مدرسې څخه لیدنه وکړه. دغه لیدنه یو فرصت و چې محصلین له دې تعلیمي چاپیریال سره آشنا شي او خپلې نظریې د مدرسې له زدهکوونکو سره شریکې کړي.
د دې لیدنې اصلي موخه د عصري او دیني علومو د ارزښت په اړه د محصلینو او زدهکوونکو پوهې لوړول بلل شوي. په دې لیدنه کې، محصلینو د تدریس طریقو، علمي او فرهنګي فعالیتونو سره آشنایي ترلاسه کړه او د دیني او عصري زدهکړو د ترکیب په اړه یې د مدرسې له فاضلانو سره خبرې وکړې.
ویل کېږي چې د داسې لیدنو ترسره کول، نه یوازې د محصلینو علمي پوهه پیاوړې کوي، بلکې د تعلیمي تجربو تبادله زیاتوي او د تحصیلي او علمي مؤسسو ترمنځ رغنده تعامل هڅوي.
د يادونې وړ ده، چې د علمي سفر پر مهال د يادې مدرسې فاضلانو ته د کابل طبي علومو پوهنتون کاتالوګونه، علمي طبي مجلې او د تدريسي روغتونونو د فعاليتونو او لاسته راوړنو بروشرونه هم توزیع شول.
