د کابل ابوعلي ابنسینا طبي علومو پوهنتون کې د آنلاین طبي ژورنال په هکله پینځمه ناسته ترسره شوه
دا ناسته د ۱۳۹۸ لمریز کال د لیندۍ (قوس) میاشتې په ۲۷مه نېټه چهارشنبې ورځ په یاد پوهنتون کې دایره شوه. په دې ناسته کې د کابل طبي علومو پوهنتون استاد محترم پوهاند ډاکتر وحیدالله مومند د خپلو خبرو په ترڅ کې وویل: "څېړنه د انسان له مهمو او اړینو ځانګړنو څخه دي، چې په قرآن عظیم الشأن کې هم په دې اړه ډېر ټینګار شوی دی." همدارنګه د پوهنتون رئیس په افغانستان کې د علمي څېړنو د مخینې په اړه هم خبرې وکړې او د خپلو خبرو په ترڅ کې یې وویل: "څېړنې او لیکوالۍ په مخکنیو زمانو کې هم زموږ په هېواد کې ډېر ارزښت درلود او ډېره وده یې کړې وه؛ تر دې چې د هرات په نامه زموږ د هیواد مجله د سیمې په کچه تر ټولو مخکښه او ځانګړې مجله وه." پوهاند ډاکتر مومند صیب د خپلو خبرو په پای کې د علمي څېړنو په برخه کې د لوړو زدهکړو وزارت له مشاور ښاغلي ډاکتر محمد وسیم اقبال څخه د یاد پوهنتون د طبي ژورنال رامنځته کولو په برخه کې د هغو د دایمي همکاریو په پار ترې مننه وکړه او د دې همکاریو د منندویۍ لپاره یې ښاغلي اقبال صاحب ته مننلیک ورکړ. بیا ښاغلي ډاکتر محمد وسیم اقبال د آنلاین طبي ژورنال د رامنځته کولو په اړه د خبرو سربېره د دې ژورنال د ودې او پرمختګ په اړه یې د هر ډول همکاریو ژمنه وکړه.
په دې ناسته کې د کابل طبي علومو پوهنتون د علمي څېړنو برخې آمر ښاغلي پوهاند ډاکتر عبدالواسع سلطاني د نوې وبپاڼې رامنځته کولو او د دې پوهنتون د افغان طبي مجلې لپاره د (ISSN) کوډ نمبر اخیستلو په هکله مفصلې خبرې وکړې. هغه د خپلو خبرو په ترڅ کې یې وویل، چې د پوهنتونونو او علمي بنسټونو اعتبار او موقف د علم او څېرنو په اساس سنجول کېږي او که په یو علمي بنسټ کې څېړنې ترسره نشي، نو دا په دې معنا ده، چې په هغه بنسټ کې علم تولید شوی نه دی.
د غونډې په پای کې د دې پوهنتون استادانو د اړوندې موضوع په هکله خپل نظرونه او وړاندیزونه بیان کړل.
