د کابل طبي علومو پوهنتون «ابو علي ابن سینا» اړوند علي آباد تدریسي روغتون د آنکولوژي او بطني جراحي ډيپارټمنټ ډاکټرانو په Whipple روش سره د ننګرهار ولایت اوسېدونکي یو ۴۵ کلن ناروغ د پانکراس پرمختللی جراحي عملیات بریالی ترسره کړ.
د دغه ډيپارټمنټ غړي پوهنیار احمد عمر امیري په وینا، ناروغ د بدن ژېړوالي، پوستکي خارښت او لړزې له امله د روغتون عاجلې څانګې ته مراجعه کړې وه چې له بشپړ تشخیصیه معایناتو وروسته د صفراوي غدې په وروستۍ (CBD)برخه کې د کتلې شتون له امله یې Obstructive Jaundice تشخیص او د جراحي عمليات وړ و بلل شو. د عملیات په جریان کې د صفراوي غدې په مجرا (خالیګا ) کې مشخصه پتالوژي ونه لیدل شوه؛ مګر د مجرا اړخو له کتنې وروسته د پانکراس په سر د ۳×۴ سانتي مترو په اندازه یوه سخته کتله (تومور) تشخیص شو چې ناروغ ته د Whipple پرمختللی پروسیجر تطبیق شو.
د یادولو وړ ده چې ناروغ له ۲۸ ورځې بستر او جدي څارنې وروسته د قناعت وړ روغتیايي وضعیت په لرلو سره له روغتون څخه رخصت شو او د بشپړ درملنې د دوام لپاره هم د کیموتراپي څانګې ته معرفي شو.
