د کابل طبي علومو پوهنتون اړوند میوند تدریسي روغتون د غوږ او ستوني برخې متخصصانو یو پېچلی او نادره جراحي عملیات په بریالي ډول تر سره کړ.
میوند تدریسي روغتون وایي، د یو هېوادوال په مرۍ کې یو بېرونی څیز (شپېلۍ) نښتی و، میوند تدریسي روغتون ته تر مراجعې او د دغه روغتون د متخصصینو او ډاکترانو له بررسۍ او د معایناتو تر بشپړېدو وروسته یې عملیات په بریالي ډول تر سره او شپېلۍ د ناروغ له مرۍ راویستل شوه.
د دغه روغتون د غوږ او ستوني ډيپارټمنټ استاد پوهندوی دوکتور عارف ابراهیمي چې دغه عملیات یې په بریالي ډول سرته رسولی وایي؛ د ۳۵ سانتي مترو په اوږدږالي او ۳ سانتي متر پنډوالي په لرلو سره د لرګي شپېلۍ د ناروغ په مرۍ کې موجوده وه چې د نوموړي د تنفسي او هضمي سیستم د بندېدو لامل شوې وه، ډاکټر ابراهیمي زیاته کړه چې تر اوسه پورې د روغتون په کچه داسې عملیات نه و ترسره شوی چې دا لومړی ځل دی دا ډول عملیات په بریالي ډول ترسره کېږي.
د یادولو وړ ده چې د میوند تدریسي روغتون د دغه روغتون د ډاکترانو او مسلکي متخصصینو د پوهې او ظرفیت په لوړولو سره ډېره هڅه کوي ترڅو خپلو هېوادوالوته ښه روغتیایي خدمات وړاندې کړي.
