مولوي عبدالرحمن مرحوم د کابل طبي علومو پوهنتون د مالي او اداري مرستیال په توګه معرفي شو.
مولوي عبدالرحمن مرحوم شنبه د رمضان المبارک میاشتې پر ۱۷ نېټه د لوړو زده کړو وزارت د بشري سرچینو رئیس مفتي عبدالکریم امیري او د یاد وزارت ویاند حافظ ضیاء الله هاشمي لخوا، په داسې حال کې چې د کابل طبي علومو پوهنتون رئیس پوهنیار دوکتور فضل الرحمن رحماني او د دغه پوهنتون رهبري هیئت هم حضور درلود، د یو لړ مراسمو په ترڅ کې د کابل طبي علومو پوهنتون د مالي او اداري چارو مرستیال په توګه استادانو او کارکوونکو ته ور وپېژندل شو.
د کابل طبي علومو پوهنتون رئیس په اداره کې بدلون او تحول يو اصل وباله او داسلامي شريعت په رڼا کې يې د وظيفې پر ځانګړتياو خبرې وکړې او ويې ويل: "په ژمنتيا او اخلاص سره د مسووليت ترسره کول د خداى (ج) د عبادت وسيله ده" پوهنیار رحماني د تېر مالي او اداري مرستیال له دندو او فعالیتونو څخه ستاینه وکړه او نوي مرستیال ته یې د بریالیتوب دعا وکړه.
نوي مالي او اداري مرستيال د افغانستان خلکو لپاره خدمت او کار کول د اسلامي نظام مسووليت او صادقانه کار يې عبادت وباله، مولوي عبدالرحمن مرحوم له استادانو او کارکوونکو څخه وغوښتل چې په بېلابېلو برخو او اداري چارو کې خپلې همکارۍ او مشورې ورسره شريکې کړي.
په دې غونډه کې پخواني مالي او اداري مرستيال خپلې تجربې شريکې کړې او ويې ويل چې په اسلامي نظام کې دنده دروند بار دئ او نوي مرستيال ته يې په ټولو اداري چارو کې د همکارۍ ډاډ ورکړ.
