په کابل طبي علومو پوهنتون کې د الکترونیکي زده کړو دوه ورځنی ورکشاپ دایر شو
د الکترونیکي زده کړو د مدیریت سیستم (HELMS) روزنیز ورکشاپ نن چهارشنبه د روان کال لیندۍ پر ۲۲ د استادانو آمریت له لوري د (HELMS) سیستم د پلي کولو څرنګوالي، د الکترونیکي زده کړو له اساسي مفاهیمو سره بلدیت، د سیستم د کارولو طریقه، د داخلي کورسونو جوړولو او د کابل طبي علومو پوهنتون استادانو لپاره د درسي موادو د تنظیم په موخه دایر شو.
د دغه ورکشاپ پیلامه د الکترونیکي زده کړو د ورکشاپونو د اړتیا او اهمیت په اړه د پوهنتون د استادانو چارو آمر پوهنمل دوکتور محب الله صالح له لوري وشوه، وروسته د طبي فزيک ډيپارټمنت استاد داد محمد بهروز ناصري د الکترونیکي زده کړو د پېژندنې، موخو، ګټو، اړتیاوو، میتودونو، د الکترونیکي درسي موادو تهیه کولو او د HELMS سیستم د کارونې د څرنګوالي په اړه ښونیز پرزېڼټېشن وړاندې کړ.
د یادولو وړ ده چې د دغه ورکشاپ ګډونوال د الکترونیکي زده کړو (HELMS) سیستم د مدیریت اړوند مسایل د دوه ورځو په بهیر کې په نظري او عملي ډول زده کوي.
