د کابل طبي علومو پوهنتون رئیس شیخ الحدیث مفتي احسان الله ابوالفیضان د روغتیا نړیوال سازمان (WHO) له استازو سره لیدنه وکړه. دغه ناسته د دوه اړخیزو همکاریو پراخوالي په ځانګړي ډول د سرطاني ناروغیو د درملنې په برخه کې د ظرفیت جوړونې په موخه ترسره شوه.
په دغه لیدنه کې د کابل طبي علومو پوهنتون رئيس د علمي او تخنیکي ظرفیت لوړونې لپاره د مناسبو فرصتونو زمینې برابرولو د اهمیت په اړه خبرې وکړې او د طبي وسایلو مرستې او ظرفیت لوړونې په برخه کې د اغېزناکو همکاریو غوښتنه وکړه. نوموړي همدارنګه سرطاني ناروغانو ته د ښې رسېدنې لپاره د زمینې برابرولو په برخه کې د پوهنتون رهبرۍ د هڅو یادونه وکړه.
د روغتیا نړیوال سازمان استازو هم د روانو همکاریو څخه د ستاینې تر څنګ؛ څرګنده کړه چې د سرطان په برخه کې ظرفیت جوړونه اړینه ده او د دغه برخې پیاوړتیا به اغېزمنه واقع شي. هغوی ژمنه وکړه چې د لازمو کتنو وروسته به د لا زیاتو همکاریو په برخه کې په ځانګړې توګه د تخنیکي مرستو په اړه لازمې پرېکړې ونیول شوې.
د یادولو وړ ده چې د روغتیا نړیوال سازمان استازو د کابل طبي علومو پوهنتون اړوند علي آباد تدریسي روغتون د سرطاني ناروغیو جامع مرکز څخه هم لیدنه وکړه.
