د کابل طبي علومو پوهنتون اړوند علي آباد تدریسي روغتون کارمندانو د دیني درسونو آزموینه د لوړو زده کړو وزارت د دعوت او ارشاد ریاست استازي او مدرس مفتي ولي محمد محمدي او دکابل طبي علومو پوهنتون د دعوت او ارشاد آمریت مسوولینو په حضور واخیستل شوه.
مفتي محمدي د آزموینې له بهیر څخه د نظارت تر څنګ په خپله وینا کې د دیني او عصري علومو د زده کړې ارزښت ته اشاره وکړه او ویې ویل چې په دیني مسایلو باندې پوهه کولای شي د وګړو په کاري اخلاقو کې اغېزناکه ونډه ولري.
د کابل طبي علومو پوهنتون د دعوت او ارشاد آمریت مسوولینو په وینا په کاري چاپېریال په ځانګړې توګه په روغتونونو کې د دغه ډول پروګرامونو تطبیق د کارمندانو په اخلاقو، کړنو او لیدلوریو کې مثبت اغېز لري او د هغوی د کار، کړنو او اسلامي ارزښتونو ترمنځ د همغږۍ لامل شوی دی.
