د لومړي ځل لپاره په کابل طبي علومو پوهنتون کې د قرانکریم د تفسیر او ترجمې دوره پیل شوه
د کابل طبي علومو پوهنتون د کارکوونکو، استادانو او محصلینو لپاره د قرانکریم د معنا او مفهوم د زده کړې او همدا راز د اسلامي فرهنګ د ودې په موخه د الهي کلام د ترجمې او تفسیر لومړۍ دوره د دغه پوهنتون د دعوت او ارشاد آمریت له لوري پیل شوه.
د کابل طبي علومو پوهنتون رئیس پوهنیار دوکتور فضل الرحمن رحماني د قرانکریم د نزول او موخو په اړه خبرې وکړې او زیاته یې کړه: قرانکریم حق کتاب دی او الله (ج) د بشریت د لارښوونې لپاره نازل شوی دی ترڅو د ژوند ټولې چارې د هغه مطابق تنظیم کړو.
پوهنیار رحماني له ټولو کارمندانو وغوښتل چې هره ورځ د تفسیر او ترجمې په درسونو کې ګډون وکړي.
د پوهنتون د دعوت او ارشاد آمر مولوي حبیب الله حماد د تفسیر او ترجمې ارزښت او فضیلت ته په اشارې وویل، د تفسیر او ترجمې دورې پیل موخه له معنا او تفسیر سره د قرانکریم زده کړه او په خپل ژوند کې د دې کلام د لارښونو عملي کول دي.
د یادولو وړ ده چې د قرانکریم د ترجمې او تفسیر درسونه هره ورځ له رسمیاتو نیم ساعت مخکې له مهالویش سره سم به دوام
ولري.
