د کابل طبي علومو پوهنتون د محصلانو چارو مرستیال د پوهنتون شپږو پوهنځیو محصلانو له استازو سره د چارو، اړیکو او همغږۍ په اړه ناسته تر سره کړه.
دغه غونډه چې د محصلانو چارو مرستیال استاد ماسټر عطا الله فیضي په مشرۍ جوړه شوه، د پوهنتون مالي او اداري مرستیال مولوي عبد الرحمن مرحوم، د اړیکو او عامه پوهاوي آمر استاد صبغت الله سجاد په ګډون سره د سپورتي پروګرامونود ترتیب، د فراغت غونډې، د آزادۍ جشن او جدیدالشمولو محصلانو ته د ښه راغلاست پروګرامونو په اړه د محصلانو چارو مرستیال لخوا هر اړخیزې خبرې وشې.
په دغه ناسته کې مالي او اداري مرستیال د اسلامي اخلاقو د اصولو مراعاتولو او غوره سلوک په اړه خبرې وکړې او له ټولو محصلانو یې وغوښتل چې د زده کړو تر څنګ غوره اخلاق او سلوک اختیار کړي.
وروسته د اړیکو اوعامه پوهاوي آمر استاد صبغت الله سجاد د دغه آمریت د فعالیتونو او پروګرامونو په اړه معلومات وړاندې کړل، محصلین یې مقالو لیکلو ته وهڅول او له هغوی څخه یې وغوښتل چې خپلې مقالې له یاد آمریت سره شریکې کړي څو د پوهنتون مهالنۍ له لارې نشر شي او نور خلک هم ترې ښه ګټه واخلي.
په پای کې د محصلانو استازو په نوبت سره خپلې ستونزې او نظریات وړاندې کړل چې د محصلانو چارو مرستیال د دوی د ستونزو د حل ژمنه وکړه.
