د «ډيجیټلي غاښونو جوړونې» تر عنوان لاندې یو ورځنی سیمینار تر سره شو
د کابل طبي علومو پوهنتون د پاکستان هېواد چوغتایي ډيجیټلي غاښ جوړونې اسټډیو په همکارۍ د غاښ جوړونې په برخه کې د نوې ټکنالوژۍ کارونې سره د ډاکټرانو او جراحانو د بلدتیا په موخه د (Digital Dentistry and Innovative Dental Solution روزنیز ورکشاپ جوړ کړ.
د کابل طبي علومو پوهنتون سر پرست رئیس دوکتور مفتي اسد الله نجات د دغه ورکشاپ د ارزښت او اهمیت په اړه خبرې وکړې او ویې ویل چې د غاښونو برخه هم د نورو طبي برخو په څېر د پرمختګ په حال کې ده او په دغه ډګر کې نوې ټکنالوژي او وسایل اختراع کېږي چې موږ باید د نړیوالو معیارونو مطابق مخکې ولاړ شو او له نوې تکنالوژۍ څخه ګټه واخلو.
په دغه ورکشاپ کې د پاکستان هېواد چوغتایي ډيجیټلي غاښ جوړونې اسټډیو استازي ډاکټر فیصل خپل پرزنټېشن چې له انالوګ څخه په ډيجیټلي سیستم سره د غاښونو جوړونې د پېژندنې په برخه کې یې چمتو کړی و؛ د ښکلې مسکا رامنځته کولو طراحي، د امپلنټ لپاره د برنامې جوړولو او درې بعدي جزيي پروتیزونو په اړه معلومات وړاندې کړل.
د یادولو وړ ده چې په یاد ورکشاپ کې د ستوماتولوژي تدریسي روغتون، ۴۰۰ بستر، او نورو خصوصي روغتونونو ډاکټرانو او جراحانو ګډون کړی و.
