د علمي چارو مرستیال پوهاند دوکتور نجیب الله امرخېل په مشرۍ د کابل طبي علومو پوهنتون د ستراتیژیک پلان کمېټې ناسته ترسره شوه. په دغه ناسته کې د پوهنتون ستراتيژيک پلان اړوند اساسي او مهمو موضوعاتو په اړه هر اړخیز بحث وشو.
د ناستې په اصلي موضوعاتو کې لوړو زده کړو وزارت ته د ستراتيژیک پلان د نظارت راپور لېږلو بهیر، له دغه پلان څخه د نظارت کلني راپور ترتیب او د پوهنتون نوي پنځه کلن ستراتيژيک پلان د مسودې جوړولو لارې چارې او نور مهم موضوعات شامل وو. همدا رنګه د راتلونکو ناستو او پرېکړو کولو په بهیر کې د کمېټې غړیو پر فعالې ونډې اخیستلو هم ټینګار وشو. د ګډونوالو له لوري د مطرح شویو موضوعاتو په اړه لازمې پرېکړې ترسره شوې څو د پوهنتون ستراتيژيک پلان جوړونې او ارزونې بهیر په اغېزمنه توګه دوام ومومي.
