د علي آباد تدریسي روغتون د نرسنګ مسلکي بستونو آزموینه د شاو خوا ۲ زره تنو نوماندانو په ګډون سره واخیستل شوه.
د کابل طبي علومو پوهنتون اړوند علي آباد تدریسي روغتون د نرسنګ مسلکي بستونو چې د آزادې سیالۍ له لارې اعلان ته سپارل شوي و، نن جمعه د روان کال ليندۍ پر ۱۷ د لوړو زده کړو وزارت د بشري سرچینو رئيس مفتي عبدالکریم امیري، د لوړو زده کړو وزارت حقوقي مشاور مولوي عبدالله سیحان، د محصلانو چارو مرستیال استاد عطاءالله فیضي او موظف هیئت په حضور سره د سوالاتو صندوق پرانیستل شو او آزموینه د اړیکو او عامه پوهاوي آمر استاد صبغت الله سجاد لخوا د قرانکریم د څو آیتونو په تلاوت سره په رسمي ډول پیل شوه.
په دغه آزموینه کې ۱ زرو ۹۶۰ تنو ګډون کړی و چې له ډلې یې ۸۶۰ تنه ښځینه او ۱۱۰۰ تنه نارینه و، د ښځينه نوماندانو پراخ ګډون ۴۳ سلنه و چې د ښځینه وو آزموینه سهار او د نارینه وو آزموینه ماسپښین د پوهنتون له لورې په شفاف ډول واخیستل شوه.
د لوړوزده کړو وزارت د بشري سرچینو رئيس د لیاقت او وړتیا په اړه خبرې وکړې او ویې ویل چې دغه بستونه آزادې سیالۍ ته وړاندې شوي تر څو مینهوال د خپل لیاقت پر بنسټ د لوړو نمرو په تر لاسه کولو له واسطې پرته اړوند بست ته ور وپېژندل شي، څو حق حقدار ته ورسي. نوموړي همدا راز د آزموینې له روڼتیا ډاډ ورکړ او له ګډونوالو یې وغوښتل چې د آزموینې نظم او اصول ته پام وکړي.
د ویلو وړ ده، د کابل طبي علومو پوهنتون اړوند د نورو کادري روغتونونو مسلکي بستونو چې د آزادو سیالیو له لارې اعلان ته سپارل شوي وو، د آزموینې نېټه به یې په راتلونکیو ورځو کې له مهالوېش سره سم اعلان او دا پروسه به تر پایه دوام ولري.
