د هېواد نامتو علمای کرامو لخوا د کابل طبي علومو پوهنتون او اړوندو تدریسي روغتونونو استادانو او اداري کارمندانو ته درې ورځنی اصلاحي – علمي سیمینار، پر دیني مسایلو د لا ښه پوهېدو او بلدتیا په موخه د دغه پوهنتون رهبرۍ په ګډون جوړ شو.
د سیمینار په پیل کې د کابل طبي علومو پوهنتون رئیس پوهنیار دوکتور مفتي اسدالله نجات ګډون والو ته د ښه راغلاست تر څنګ په علمي چاپېریال کې د دغه ډول سیمینارونو جوړېدو پر اغېزمنیتا، د اخلاص پر ارزښت، ريښتینولۍ او ښه نیت په اړه خبرې وکړې او په دغه اصولو یې ټينګار وکړ چې د تدریس، څېړنو او روغتیایي خدماتو وړاندې کولو په ټولو مراحلو کې باید دا اصول مراعات شي.
د سیمینار په دوام کې د چارو ادارې رئیس شیخ مولوي انورالحق انور د پیغمبر (صلی الله علیه وسلم) د سنتو پر پیروي او په اسلام کې د ښځو حقونو او مقام د اهمیت په اړه او د سترې محکمې د دارالفتاء مسلکي غړی شیخ سبحان الله فاروقي د اخلاص، نیت او تقوا، د ایمان تعریف او د ایمان څانګو د اهمیت په اړه خپل سیمینارونه وړاندې کړل.
د یادولو وړ ده، یاد سیمینار درې ورځې دوام لري چې پکې استادانو او کارمندانو ته د لا پوهې او بلدتیا په موخه د هېواد نامتو علماوو له لوري دیني مسایل وړاندې کېږي.
