د کابل ابوعلي ابنسینا طبي علومو پوهنتون کې د ښاري چاپېریال او د هغه اړوندو ستونزو په هکله دویمه خبري ناسته
دا ناسته چې د ۱۳۹۸ لمزیز کال د لړم (عقرب) میاشتې په ۲۹مه نېټه د کابل ابوعلي ابنسینا د طبي علومو پوهنتون د کنفرانسونو په لومړۍ شمېره اتاق کې دایر شوه، د قرآن پاک څو مبارکو آیتونو په تلاوت سره پیل شوه. په دې ناسته کې د یاد پوهنتون رییس، د عامې روغتیا پوهنځي رییس، استادانو او محصلانو، او د کابل ښاروالۍ آغلې معیینې ګډون کړی وو. په دې ناسته کې لومړی د کابل ښاروالۍ د ملاتړ پروګرام مسئوول ښاغلي ډاکتر عبدالاحد سهرابي په مفصل ډول دا پروګرام ګډونوالو ته معرفي او د اړوندو بنسټونو کاري لیدلوري یې مشخص کړل.
بیا د کابل ابوعلي ابن سینا د طبي علومو پوهنتون رئیس ښاغلي پوهاند ډاکتر وحیدالله مومند د چاپېریال ساتنې د موضوع په هکله خبرې وکړې او د طبابت له نظره یې دا موضوع بیان کړه، دغه راز هغه د خپلو خبرو په ترڅ کې د اسلام له دین سره د دې موضوع د مستقیم تړاو په هکله هر اړخیزې خبرې وکړې او ګډونوالو ته یې وویل، چې د اسلام سپیڅلي دین چاپېریال ساتنې په برخه کې ډېر ټینګار کړی، چې په بېلابېلو آیتونو او احادیثو کې ورته اشاره شوې او په دې ټولو د عمل کولو په برخه کې باید ډېرې هلې ځلې وکړو.
بیا د کابل ښاروالۍ د ښاري خدماتو معیینې آغلې ډاکترې مهتاب عالمي هم د ناستې اړوند موضوع په هکله خپل نظر او لیدلوری بیان کړ.
د غونډې په دویمه برخه کې د عامې روغتیا او چاپېریال ساتنې برخې د متخصصینو په وسیله د پنل دسکشن موضوع پیل، د چاپېریال ساتنې بېلابېل اړخونه یې بیان او د چاپېریال د ودې بېلابېلې لارې یې و ارزولې.
