د کابل طبي علومو پوهنتون اړوند د سينې، زړه او رګونو ناروغيو په انسټېټیوټ کې د زړه خلاص عملیات پیل شول.
په یاد انسټېټیوټ کې د زړه خلاص عملیات د وسايلو او تجهیزاتو د نشتوالي له امله بند شوي وو، چې دې وروستیو کې د چارواکو په هڅو او د وسایلو او تجهیزاتو په پېرلو سره یو ځل بیا د زړه خلاص جراحي عملیات او د زړه ولادي نقیصه ترمیم پیل او په بریالیتوب سره د یو ١٤ کلن ماشوم د زړه خلاص عملیاتو ترسره شول.
په همدې اړه جوړو شویو مراسمو کې چې د روان کال د تلې میاشتې په دیارلسمه نېټه د کابل طبي علومو پوهنتون د غونډو په تالار کې جوړ شوي وو د لوړو زده کړو وزارت سرپرست وزیر الحاج مولوي عبدالباقي د کابل طبي علومو پوهنتون رئیس پوهنیار ډاکټر فضل الرحمن رحماني، ډاکټرانو او استادانو سربیره لسګونو میلمنو برخه لرله.
د لوړو زده کړو سرپرست وزیر الحاج مولوي عبدالباقي په دغه انسټیټیوټ کې د زړه د خلاصو جراحي عملیاتو په پیلیدو خوښي څرګنده کړه او ټولو هېوادوالو ته یې د مبارکۍ ترڅنګ دا د هېوادوالو لپاره یوه لویه لاسته راوړنه وبلله.
د مراسمو په پای کې د زړه، سینې او رګونو ناروغیو انسټیټیوټ پخواني رئیس ډاکټر عبدالمطلب شینواري او د جراحۍ څانګې استاد او د دغه انسټیټیوټ سرطبیب ډاکټر احمد فواد وردګ ته چې د خپل متخصص ټیم په مرسته یې د ١٤ کلن ماشوم عملیات په بریالیتوب سره ترسره کړي وو، د لوړو زده کړو وزیر له خوا د ستاینلیک په ورکولو سره وستایل شو، او همداراز عملیات شوي ناروغ ته نغدي مرسته هم ورکړل شوه.
