د کابل طبي علومو پوهنتون رهبري پلاوي د نړیوال روغتیایي بنسټ له استازي سره د روحي (رواني) روغتیا په برخه کې د یو کلن (ديپلومه) پروګرام جوړولو په اړه لیدنه وکړه
نن شنبه د روان کال د وږي پر ۱۱ د پوهنتون رهبري د نړیوال روغتیایي بنسټ د مدیترانې ختیځې حوزې حوزوي مشاور له ډاکټر خالد سعید سره په داسې حال کې چې مالي او اداري، علمې او محصلانو چارو مرستیالانو هم ګډون درلود، په کابل طبي علومو پوهنتون کې د دغه پوهنتون فارغانو ته د روحي (رواني) روغتیا په برخه کې د(یوکلن) ديپلومه پروګرام په اړه جوړه شوې ناسته کې خبرې اترې وکړې.
په دغه ناسته کې دواړو خواوو له دوامدارو همکاریو مننه وکړه او د دغه څانګې رامنځته کېدل یې د روحي ستونزو د حل او ناروغانو ته د رسېدنې په خاطر د هېواد مهمه اړتیا وبلله او تاکید یې وکړ چې دغه څانګه ژر تر ژره رامنځته او لا تقویه شي.
علمي مرستیال پوهاند دوکتور نجیب الله امرخېل د خوښۍ څرګندولو تر څنګ وویل چې افغانستان له څلورو لسیزو راهیسې د مختلفو بهرنيو یرغلونو او داخلي ناخوالو مرکز دی او زیات افغانان له روحي ستونزو سره مخ دي چې د دغه پروګرام په جوړولو سره به دا ستونزې را کمې شي.
د نړیوال روغتیایي سازمان د مدیترانې ختیځې حوزې، حوزوي مشاور وویل چې له روحي ستونزو سر سره په افغانستان کې ښه پرمختګونه شوي او د شته نیمګړتیاوو لپاره دغه سازمان په پام کې لري ترڅو د لوړو زده کړو او عامې روغتیا وزارتونو په همکارۍ د روزنیزو پروګرامونو په جوړولو، د مرکز او ولایتو په کچه د ډاکترانو په ظرفیت لوړولو سره د موجوده بشري ځواک په وسیله دا ستونزې او نیمګړتیاوې حل کړي.
استاد عطاءالله فیضي، د محصلانو چاور مرستیال په دغه برخه کې د دغې پروسې کاري چوکاټ ته د اشارې ترڅنګ، د یو پرېکړهلیک د لاسلیک یادونه هم وکړه. همدا راز په غونډه کې د تخنیکي او همغږۍ، کاریکولم جوړولو، بودیجې، د عملي کارونو، بشري سرچینو پیداکولو کمېټې جوړولو، د مسوول شخص په توګه د یو کس ټاکلو او په دغه برخه کې د همکارۍ پرېکړهلیک د جوړولو په اړه بحث وشو.
په اخر کې د نړیوال روغتیایي بنسټ د مدیترانې ختيځې حوزې حوزوي مشاور او کابل طبي علومو پوهنتون د دغه پروګرام په رامنځته کولو او پیاوړتیا کې له خپلو همکاریو ډاډ ورکړ.
