د کابل طبي علومو پوهنتون علمي شورا غونډه د دغه پوهنتون د رئیس پوهنیار ډاکټر مفتي اسدالله نجات په مشرۍ د پوهنتون مرستیالانو، د پوهنځیو او روغتونونو رئیسانو او استادانو په ګډون جوړه شوه.
د غونډې په پیل کې، د کابل طبي علومو پوهنتون رئیس ګډونوالو ته د ښه راغلاست ترڅنګ وویل: "د دغه بنسټ اصلي موخه د ځوانو ډاکټرانو روزنه او ناروغانو ته د ښه روغتیایي خدماتو وړاندې کول دي او په دې برخه کې يې ټینګار وکړ چې استادان، مسولان او روغتیایي کارکونکي باید محصلانو ته ښه روزنه او ناروغانو ته د ښه روغتیایي خدمات په وړاندې کولو کې لازمه پاملرنه وکړي."
په دې غونډه کې د پوهنتون په چوکاټ کې د تغذیې پوهنځي د جوړولو، په روغتونونو کې د رضاکار ډاکټرانو د ګمارنې لپاره د ځانګړي او معیاري طرحې جوړول، د استادانو ګمارنې، علمي ترفیعاتو او نورو مسایلو په اړه له هراړخیز بحث وروسته، اړینې پریکړې وشوې.
