د کابل طبي علومو پوهنتون محصلینو ته د بیزو چیچک ناروغۍ په اړه د عامه پوهاوي سیمینار وړاندې شو
دغه سیمینار د یادې ناروغۍ په اړه د محصلینو د بلدتیا په موخه د نرسنګ پوهنځي اړوند د مور او ماشوم ډيپارټمنټ غړي استاد پوهنیار ذاکر حسین حسین پور لخوا وړاندې شو.
په دغه سیمینار کې د بیزو چیچک ناروغۍ د مختلفو موضوعاتو لکه: د تنفسي یا خولې د ترشحاتو، ناروغ شخص ته د نيږدې کېدو، په زخمونو باندې د لاس وهلو، د ناروغ کس په شخصي وسایلو د لاس وهلو او همدا رنګه په دغه ناروغۍ باندې د ککړو حیواني محصولاتو یا غوښې خوړلو، د یادې ناروغۍ نښو( د پوستکي التهاب، تبې، سر درد، ستوني درد، ملا درد، عضلاتو درد، کمزورتیا )، د خپرېدو کچې، نړیوالو شمېرو، ، خپرېدو د مخنیوي، درملنې او مختلفو موضوعاتو په اړه معلومات وړاندې شول.
د بیزو چیچک ناروغي د انسانانو او څارویو ترمنځ ګډه ناروغي ده یعنې له حیواناتو څخه انسانانو ته انتقالېږي چې لومړی ځل په ۱۹۵۸ زېږدیز کال د ډنمارک هېواد په یو لابراتوار کې په یو شمېر بیزو ګانو کې تشخیص شوې وه چې د وخت په تېرېدو سره څېړنو ثابته کړه چې دا ناروغي کېدای شي انسانانو ته هم انتقال شي.
په همدې حال کې د سیمینار ګډونوالو دغه سیمینار ګټور وباله او د پوهنتون رهبري هیئت څخه یې غوښتنه وکړه چې د دغه ډول سیمینارونو جوړولو ته ځانګړې پاملرنه وکړي.
د یادولو وړ ده چې د بیزو چیچک په اړه تېر کال هم په کابل طبي علومو پوهنتون کې د عامه پوهاوي سیمینار جوړ شوی و.
