د کاپيسا ولایت یو ۲۰ کلن ځوان چې له اته کلونو راهیسې د دواړو لاسونو او پښو له بشپړ فلج څخه ځورېده؛ د کابل طبي علومو پوهنتون «ابو علي ابن سینا» اړوند علي آباد تدریسي روغتون کې د یو جراحي عملیات وروسته یې د حرکت کولو توان ترلاسه کړ.

دغه ناروغ علي آباد تدریسي روغتون ته له مراجعې وروسته تر معایناتو او دقیقې ارزونې لاندې ونیول شو او ډاکټرانو  یې د  Arnold Chiari malformation او C3–C4 syrinx ناروغي تشخیص کړه چې د اعصابو جراحي متخصص ډاکټر رحمت الله نورزي په مشرۍ یې د Syringo-subarachnoid shunt  او Posterior decompression  عملیات بریالی ترسره کړ.   

د یاد عملیات په اړه ډاکټر رحمت الله نورزی وايي: «هغه جراحي عملیاتونه چې تر دې وړاندې په هېواد کې ناشوني وو؛ اوس د افغان متخصصانو له لوري په بریالیتوب ترسره کېږي»