علي اباد تدريسي روغتون کې د پېچلو عملیاتونو د ښه ترسره کېدو په موخه Multidisciplinary Board رامنځته او لومړنۍ مشورتي ناسته یې ترسره کړه.
د کابل طبي علومو پوهنتون اړوند په علي اباد تدریسي روغتون کې د سرطاني پېچلیو ناروغیو او سختو عملیاتونو د ښه او بریالي ترسره کېدو په موخه Multidisciplinary Board په نامه یو ځانګړی بورد د انکولوژي ډیپارټمنټ په مشرۍ د پتالوژي، رادیولوژي، جراحي او داخلې ډیپارټمنټونو په ګډون رامنځته او لومړنۍ رسمي غونډه یې د دغه روغتون رییس ډاکتر عبدالمطلب شینواري او رهبري پلاوي په حضور ترسره کړه.
د ښاغلي شینواري په وینا هغه سرطاني ستونزمنې او سختې پېښې یا عملیاتونه چې نورو روغتونو کې نه ترسره کیږي او دلته یې ترسره کېدل ممکن وي په دغه ډول ناستو کې به ورته د اړونده برخې متخصصینو لخوا د ښه ترسره کېدو په موخه مشورتي او تخصصي ناسته ترسره شي.
د یادونې وړ ده چې د علي اباد په تدريسي روغتون کې د سرطاني ناروغیونو یا انکولوژي دیپارتمنت چارې له تیرو څو میاشتو راهیسې پیل شوې چې محصلینو ته د عملي زده کړو سربېره په سرطاني ناروغیو د اخته ګڼ شمېر هېوادوالو د پیچلو او نادره عملیاتونو تداوي او عملیاتونه په بریالي توګه ترسره کړي دي.
