په علي آباد تدریسي روغتون کې د ورمېږ ډیسک بریالی عملیات ترسره شو
شنبه د روان ۱۴۴۴هـ ق کال د ذوالقعدې میاشتې پر ۷ نېټه د کابل طبي علومو پوهنتون اړوند په علي آباد تدريسي روغتون کې د ورمېږ ډیسک (د مهرو تبدیل) عملیات بریالی ترسره شو.
د اعصابو جراحي ډيپارټمنټ غړي پوهاند ډاکټر احمد فواد پیرزاد چې دا عملیات یې تر سره کړی، وویل:"ناروغ د ورمېږ په ساحه کې دوامداره درد درلودل چې د درملو له کارولو سره سره بیا هم ښه نه شو. په ورمېږ کې د مهرو د درد په زیاتېدو سره، د یو بریالي عملیات په ترڅ کې د ورمېږ درې مهرې لرې او پر ځای یې د تیتانیوم فلزي مهرې ځای پر ځای شوې، چې اوس مهال د ناروغ وضعیت ښه دی".
د هغه په وینا پر مهرو باندې ضربه یا د فشار راتلل، د عمر زیاتوالی، درانده کارونه کول او د ورمېږ او ملا حرکت ته نه پاملرنه د ورمېږ او ملا ډېسک لاملونه دي. نوموړي زیاته کړه د ملا او ورمېږ له ډیسک څخه د مخنیوي په موخه په کاري ساحه کې د تخنیکي توکو لکه کمپوټر او موبایل کارولو پر مهال اړینو ټکو ته باید پام وشي او د درنو وزنونو له پورته کولو او بیځایه حرکاتو څخه ډډه وکړو.
