کابل طبي علومو پوهنتون د افغانستان په کچه د لومړي ځل لپاره د پتالوژي ماسټرۍ پروګرام آزموینه د دغه څانګې د نوماندانو په ګډون ترسره کړه
یاده آزموینه چې د پوهنتون رهبري او آزموینو ملي ادارې هيئت تر نظارت لاندې، په معیاري چاپېریال کې ترسره شوه موخه یې دغه ماسټرۍ پروګرام ته د نوماندانو شاملېدو او د هغوی د علمې ځواک او تخصصي مهارتونو ارزونه ده.
د کابل طبي علومو پوهنتون رئیس پوهنیار دوکتور مفتي اسد الله نجات وویل چې دغه پروګرام د لومړي ځل لپاره په افغانستان کې په دغه پوهنتون کې د پتالوژيکو ناروغیو د تشخیص او تحلیل په برخه کې د متخصصانو د روزنې لپاره جوړ شوی دی او ډېر ژر به یې درسونه پيل شي. نوموړي زیاته کړه چې د یاد پروګرام مخته وړلو لپاره بشپړ چمتوالی لرو.
د یادولو وړ ده چې په دغه آزموینه کې ۶۵ تنه نوماندانو ګدون درلود چې د آزموینو ملي ادارې له لوري يې آزموینه واخیستل شوه.
