د کابل طبي علومو پوهنتون علمي شورا او پوهنځي ته د انستیزي ډيپارټمنټ ارتقا په اړه بحث ترسره شو!
نن سې شنبه د روان کال سلواغې پر ۲۴ د کابل طبي علومو پوهنتون "ابو علي ابن سینا" علمي شورا د دغه پوهتنون رئیس دوکتور مفتی اسد الله نجات په مشرۍ او د دغه پوهنتون معاونینو، د پوهنځیو او تدریسي روغتونونو رئیسانو او نورو غړیو په ګډون ترسره شوه.
غونډه د قرآن کریم د څو آیتونو په تلاوت سره پیل شوه، وروسته د پوهنتون رئیس دوکتور مفتی اسدالله نجات د خپلو خبرو په ترڅ کې د هغه استادانو د بیا راتګ په اړه چې د زده کړو لپاره له هېواد بهر تللي وو خبرې وکړې او له هغه استادانو چې د تحصیلي دورې له پای وروسته بېرته هېواد ته راغلي او خدمت کوي، مننه وکړه.
په دوام یې پر مختلفو موضوعاتو لکه د پوهنځي کچې ته د انستیزي ډیپارټمنټ ارتقا، په پوهنتون او تدریسي روغتونونو کې د ډیپارټمنټونو تقسیمات، د استادانو د ترفیعاتو طی مراحل او د نرسنګ پوهنځي د بریجېنګ پروګرام پیل په اړه هر اړخیزې خبرې وشوې او لازم تصمیمونه ونیول شول.
