سترګو تدریسي روغتون په تېرو دوو میاشتو کې ۶۵۰۰ ناروغانو ته روغتیایي خدمات وړاندې کړي
د کابل طبي علومو پوهنتون اړوند سترګو تدریسي روغتون په بېلابېلو څانګو کې په تېرو دوو میاشتو کې ۶۵۰۰ ناروغانو ته روغتیایي خدمات وړاندې شوي دي.
د دغه روغتون د مسوولینو په وینا په دغه موده کې ۶۵۳۵ ناروغان ثبت شوي چې له ډلې یې ۲۲۶ تنه ناروغان بستر او د سترګو بېلا بېل عملیاتونه ورته ترسره شوي دي، همدا رنګه د روغتون مسوولین زیاتوي چې ۶۴۳ تنه ناروغانو او مراجعینو ته یې عینکې هم توزېع کړي دي.
د سترګو تدریسي روغتون رئیس ډاکټر محمد بشیر عثماني وايي چې دغه روغتون هوډ لري څو هېوادوالو ته باکیفیته روغتیایي خدمات وړاندې کړي.
د یادولو وړ ده چې د کابل طبي علومو پوهنتون اړوند سترګو تدریسي روغتون د زده کړو او ځوانو ډاکټرانو ته د تدریس تر څنګ، ناروغانو ته روغتیایي خدمات هم وړاندې کوي.
