د کاناډا هېواد متخصصانو له لوري ۵۰۰ تنو روغتیایي کارمندانو ته د هضمي سیستم سرطانونو لومړی سمپوزیم تر سره شو
د لومړي ځل لپاره د علي آباد تدریسي روغتون د سرطاني ناروغیو جامع مرکز له لوري د کاناډا هېواد ډاکټرانو او متخصصانو په همکارۍ د کابل طبي علومو پوهنتون اړوندو تدریسي روغتونونو د انستېزي، جراحي، داخلې او نرسنګ څانګو روغتیايي کارکونکیو ته د ظرفیت لوړونې په موخه د هاضمې سیستم سرطانونو سمپوزیم جوړ شو.
په پیل کې د کابل طبي علومو پوهنتون سر پرست رئيس دوکتور مفتي اسدالله نجات د دغه سمپوزیم جوړېدل د روغتیایي کارکونکیو په ظرفیت لوړونې او د بهرنیو هېوادونو د ډاکټرانو تجربو شریکولو لپاره مهم او ګټور وبلل او له ټولو روغتیایي کارکونکیو یې وغوښتل چې د یاد سمپوزیم له موضوعاتو څخه ښه ګټه واخلي.
د سمپوزیم په دوام د کاناډا هېواد د ډاکټرانو او متخصصانو له لوري د لویو کولمو د سرطان جراحي، مرۍ کم اغیزې جراحي، د D2 ډېسکشن د کم اغیزه ګاسترکتومي جراحي، د ازوفاګکتومي لپاره بېهوښي، له عملیات وروسته د ناروغانو ځانګړي مراقبتونه او د ازوفاګکتومي ناروغانو تر عملیات وروسته د مراقبت په اړه د کاناډایي متخصصیونو لخوا پرزنټېشنونه وړاندې شول.
د یادولو وړ ده چې د کاناډا هېواد متخصصان به د لسو ورځو لپاره د یاد پوهنتون اړوند تدریسي روغتونونو له روغتیایي کارمندانو سره په عملي کارونو کې هم همکاري وکړي.
