په علي آباد تدریسي روغتون کې د اعصابو جراحي عملیات په بریالي ډول تر سره شو
یو ناروغ چې د ملا ډېسک سره مخ شوی و او د پښو او ملا له درد څخه ځورېدو، د کابل طبي علومو پوهنتون اړوند علي آباد تدریسي روغتون ته یې مراجعه کړې وه او د یاد روغتون د اعصابو جراحي ډاکټرانو او متخصصانو له لوري یې عملیات په بریالي ډول ترسره شو.
د علي آباد تدریسي روغتون د اعصابو جراحي متخصص پوهنمل ډاکټر حسیب الله بها نجرابي وايي چې دغه ناروغ له دوه کلونو را هيسې د ملا ډېسک درلود او د ام آر آی معایناتو وروسته تشخیص شو چې د ملا په تیر کې ۴ او ۵ ډېسکونه یې بې ځایه شوي دي.
نوموړي زیاته کړه چې دغه ناروغ د درمل خوړلو او فیزیوتراپی سره سره بیا هم نه و روغ شوی او د جراحي عملیات په تر سره کولو د نوموړي بې ځایه شوي ډېسکونه د ملا له تیر څخه په بریالي ډول و ایستل شول چې له څو ورځې څارنې وروسته په ښه روغتیایي وضعیت له روغتون څخه رخصت شو.
