د علمي او روزنیزو پروګرامونو په دوام د کابل طبي علومو پوهنتون یو شمېر محصلانو د علمي او څېړنیز سفر په ترڅ کې د پکتیا او خوست ولایتونو له پوهنتونونو او خوست ولایت جهادي مدرسې څخه لیدنه وکړه.
په دغه علمي سفر کې محصلانو د دواړو پوهنتونونو د طب له پوهنځیو څخه لیدنه وکړه او د یادو تحصیلي بنسټونو له روزنیز جوړښت، تدریس لارو چارو، مجهزو لابراتوارونو، کتابتونونو او علمي امکاناتو سره بلدتیا ترلاسه کړه. همدارنګه محصلانو د خوست شیخ زاید پوهنتون تدریسي روغتون څخه هم لیدنه وکړه او د یاد روغتون روغتیايي او روزنیزو خدماتو وړاندې کېدو له بهیر سره بلدتیا ترلاسه کړه.
له بلې خوا د کابل طبي علومو پوهنتون محصلانو د لومړي ځل لپاره د خوست ولایت جهادي مدرسې څخه هم لیدنه وکړه. دغه لیدنه د کابل طبي علومو پوهنتون او یادې مدرسې د فاضلانو تر منځ د لیدلوریو د تبادلې او اسلامي ټولنې د پراختیا په مسیر کې د دیني او عصري علومو د ارزښت په موخه ترسره شوه.
د یادولو وړ ده چې دغه سفر نه یوازې د محصلانو د علمي او عملي پوهې زیاتوالي لپاره زمینه برابرونکی و؛ بلکې د تحصیلي بنسټونو تر منځ علمي او فرهنګي تعامل ته یې هم ځواکمنتیا ور وبخښله.
