په پام کې ده چې د ا.ا.ا د مشرتابه مقام په سپارښتنه په علي اباد تدریسي روغتون کې د سرطان د تشخیص او درملنې مرکز د نیمه کاره پروژې کار بېرته پیل شي.
په همدې موخه جوړه شوې ناسته کې، چې د لوړو زده کړو وزارت د اداري او زېربنا رئیس قاضي عبدالعزیز عزیزي په مشرۍ د کابل طبي علومو پوهنتون د مالي او اداري مرستیال انجنیر عظیم الله کامران اخندزاده او تړون کوونکي شرکت د مسؤلانو په ګډون کې ترسره شوه، د یادې پروژې د کار بیا پیل پر څرنګوالي او مالي لګښت خبرې وشوې.
د مسؤلانو په وینا د سرطاني ناروغۍ د تشخیص او درملنې مرکز پروژې کار ۸۰ سلنه تکمیل شوی، چې د ا.ا.ا د مشرتابه مقام په سپارښتنه او د ماليې وزارت په همکارۍ سره به یې د ۱۴۰۱ مالي کال په منځ کې مالي لګښت په پام کې ونیول شي.
د یادولو وړ ده چې د دې پروژې په تکمیلولو سره به له یوه اړخه د هېواد په داخل کې د سرطان ناروغانو تشخیص او درملنه وشي او له بله اړخه به په دې څانګه کې ځوان کادورنه وروزل شي.
